Kupa e Botës – Argjentina e Messit triumfon në finale

Leo Messi ia ka dalë më në fund të ngrejë lart trofeun e munguar dhe të shumëpritur të Kupës së Botës me Argjentinën. Skuadra e drejtuar nga trajneri Scaloni triumfoi pas goditjes së penalltive, në një nga finalet më të bukura në historinë e botëroreve të FIFA. Kjo pasi koha e rregullt e sfidës u mbyll në shifrat drithëruese 3-3.

Në pjesën e parë të takimit Argjentina ishte qartësisht ekipi më i mirë, ndërkohë që Franca nuk doli asnjëherë në lojën e vet. Kjo bëri që përpjekjet e vazhdueshme të Messit me shokë të shpërbleheshin eventualisht në minutën e 23’, kur arbitri akordi një penallti në favor të tyre. Messi nuk kishte si të gabonte nga pika e bardhë duke kaluar në avantazh të tijët. Vetëm pak minuta më vonë, amerikano-latinët shënuan një tjetër gol me autor Angel Di Maria, pas një kundërsulmi model. Pjesa e parë e përballjes u mbyll me rezultatin 2-0, dhe sfida u konsiderua tashmë e mbyllur.

Por emocionet do të vazhdonin për shumë më gjatë. Franca hyri përsëri e vakët në lojë gjatë pjesës së dytë, por gjeti ritmin e saj në 20 minutat e fundit të takimit. “Gjelat” përfituan nga një penallti e akorduar në favor të tyre për të ngushtuar diferencën në vetëm 1 gol, teksa Mbappe u tregua i saktë nga pika e penalltisë. Vetëm 1 minutë më vonë, ishte përsëri Mbappe që me një goditje fantastike në hyrje të zones barazoi rezultatin, duke dërguar në qiellin e shtatë tifozët francezë. Sfida iu drejtua kështu kohës shtesë.

Në 30 minutat ekstra Messi kaloi përsëri në avantazh të tijët, por Mbappe gjithashtu shënoi për Francën, përsëri nga pika e bardhë, duke kompletuar tripletën e tij, një moment i jashtëzakonshëm në një finale botërori.

Ekipet iu drejtuan kështu penalltive, ku heroi rezultoi të ishte portieri i Argjentinës, Emiliano Martinez. Ky i fundit ndali penalltinë e Kingsley Coman, ndërkohë që Aurelian Tchouameni goditi jashtë porte. Argjentinasit nga ana tjetër nuk humbën asnjë prej penalltive të tyre, dhe Montiel shënoi 11-metërshin e fundit, duke i hapur rrugë festës dhe ekzaltimit të jashtëzakonshëm të Messi me shokë.

The post Kupa e Botës – Argjentina e Messit triumfon në finale appeared first on Baste Sportive.